පස්සෙන් එන උදවිය

Sunday, August 11, 2013

රතුපස්වල,කටුනායක,හලාවත,ආසනික් හා ඩී.සී.ඩී.

මේ දිනවල වඩාත් කතාබහට ලක්වන සිද්දීන් දෙකක් වී ඇත්තේ රතුපස්වල ජල ගැටලුව හා ෆොන්ටෙරා සමාගමේ නිෂ්පාදනවල ඩී.සී.ඩී.(Dicyandiamide) නම් විෂ රසායනිකය අඩංගු බවට පැතිර යන පුවත්ය.මේ සිද්දීන්ගේ විශේෂත්වය වන්නේද මාධ්‍ය මගින් මේ සිද්දීන්ට ලබාදෙන ප්‍රචාරයද අවම මට්ටමක පැවතීමයි.ඒ නිසාම මෙම සිද්දීන් පිලිබදව විශේෂයෙන් හොයා බැලීම වටින්නේය.
පළමුව වැලිවේරිය සිද්දිය සලකා බලමු.මෙහිදී සාමාන්‍ය ජනතාව විසින් සිදුකල උද්ඝෝෂණයකට හමුදාව විසින් ජීව උන්ඩ යොදාගෙන වෙඩි තබා ඇත.වෙඩි වැදීමෙන් තිදෙනෙකුට ජීවිත අහිමි වූ අතර විශාල පිරිසකට තුවාල සිදු විය.මිය ගිය තිදෙනාගෙන් එක් අයෙකු සේවය නිමවා නිවස බලා යමින් සිටි ගම්පොල ප්‍රදේශයේ පදිංචිකරුවෙකු වන අතර අනෙක් දෙදෙනා උපකාරක පන්ති නිමවා නිවස බල යමින් සිටි සිසුන් දෙදෙනෙකි.පුදුම සිදුවීම නම් හමුදා මාධ්‍ය ප්‍රකාෂකවරයාට අනුව මොවුන්ගෙන් බහුතරය තුවාලවී හා මියගොස් ඇත්තේ ගල් පහරවල් වලට ලක්වීම නිසාය.ඒ අනුව වැලිවේරිය පැත්තේ ජනතාවට ගල් ගැසීම පිළිබඳව අරුම පුදුම හැකියාවක් ඇත.මන්ද ඔවුන්ගේ ගල් පහරවල් වලින් මිනිස් ශරීර පවා හිල් වන බැවිනි.
ඇතැම් සති අන්ත පුවත්පත් වාර්තා කල පරිදි මෙහිදී සිද්දිය වාර්තා කිරීමට ගිය මාධ්‍යවේදීන්ටද හමුදාව අමානුෂික ලෙස පහරදී ඔවුන්ගේ කැමරා ආම්පන්න ආදියද විනාශ කොට ඇත.හමුදාවට මෙලෙස ක්‍රියාකිරීමට උපදෙස් දුන්නේ කවුරුන්ද යන්න තවමත් සැකසහිතය.අවසානයේදී කෙදිනක හෝ මේ සිදුවීම් වලට දඩුවම් විදීමට සිදුවන්නේ ඉහල නිලධාරින්ට නොව පහල නිලධාරින්ට හා සාමාන්‍ය සෙබලුන්ටය.මේ පිළිබඳව අතීතයෙන් ඕනෑතරම් උදාහරණ ගෙනහැර දැක්විය හැක.
රතුපස්වල ජනතාව වැලිවේරියේදී හා බැලුම්මහරේදී උද්ඝෝෂණය කලේ  වැඩි පඩි ඉල්ලා හෝ බඩු මිල අඩු කර දෙන්නට කියා නොව තමන්ට බීමට පිරිසිදු ජලය ඉල්ලාය.අරුම පුදුම සිදුවීම වන්නේ උගන්ඩාවේ ජල ව්‍යාපෘතියකට ඩොලර් මිලියන 150 ක් ප්‍රදානය කල රජය තම රටේ ගමක ශ්‍රී ලාංකිකයන් පිරිසක් ජලය ඉල්ලු විට වෙඩි උණ්ඩයෙන් පිළිතුරු දීමයි.
මීට ආසන්න කාලයකදීද මෙවන් සිදුවීම් දෙකක් වාර්තා විය.ඒවා නම් පෞද්ගලික විශ්‍රාම වැටුපට එරෙහිව කටුනායකදී කල උද්ඝෝෂණයේදී තරුණයෙකු මියයාම හා හලාවතදී වැඩි කල ඉන්ධන මිලට එරෙහිව කල උද්ඝෝෂණයේදී දෙදරු පියෙකු මියයාමයි. මෙම සිදුවීම් දෙකම අපේ රටේ ජනතාවට බොහෝ දුරට අමතක වී ගොසින් ඇත.වැලිවේරිය සිදුවීමද තව දින කිහිපයකදී අපේ ජනතාවට සම්පූර්නයෙන්ම අමතකවනවාට කිසිදු සැකයක් නැත.නමුත් ගැටලුව වන්නේ දෙමල ජාතික සන්ධානය වැනි ඇතැම් කොටස් මෙවන් සිදුවීම් ජාත්‍යන්තරයට ගෙන ගොස් වාසි ලබාගැනීමට දැනටමත් කටයුතු කර තිබීමයි.ඒ නිසා මෙවන් අවස්ථාවල කටයුතු කිරීමේදී රජය මීට වඩා විමසිලිමත්වනවා නම් වටින්නේය.
මේ දිනවල කතාබහට ලක්වන අනෙක් සිදුවීම නම් ඇන්කර් කිරි පිටි ඇතුළු ෆොන්ටෙරා නිෂ්පාදනවල Dicyandiamide නම් විෂ රසායනිකය අඩංගු බවයි. මේ නිසා මෙම නිෂ්පාදන ආනයනය තාවකාලිකව අත්හිටුවා ඇති අතර වරාය තුල මෙට්‍රික් ටොන් 4500ක පමණ තොගයක් රදවා තබාගෙන ඇත.ඊට අමතරව මෙම නිෂ්පාදන වලට අදාලව සියලුම ප්‍රචාරක කටයුතු තහනම් කර ඇත.එහෙත් වෙලදපොලට නිකුත් කර ඇති මෙම නිෂ්පාදන තවමත් අලෙවි කෙරෙමින් පවතී.
මේ පිළිබඳව පරීක්ෂණ පැවැත්වූ තාක්ෂණික පර්යේෂණ ආයතනය (ITI) මෙම සිදුවීම තහවුරු කර තිබියදී සෞඛ්‍ය අමාත්‍යංශයේ ඇතැම් ඉහල නිලධාරීන් රටට විහිලු සපයමින් සිටි.ඔවුන්ට ප්‍රකාශ කර සිටින්නේ මෙම රසායනිකයට අදාලව පරීක්ෂණ කිරීමට ITI ආයතනය සතුව තාක්ෂණය හා පහසුකම් නැති බවයි.නමුත් ITI ආයතනය ප්‍රකාශ කර සිටින්නේ ඔවුනට මෙයට වඩා සංකීර්ණ පර්යේෂණ කටයුතු පවා කල හැකි බවයි.අනෙක් අතට ලොකුම විහිලුව වන්නේ මෙම නිෂ්පාදන අප රටට ආනයනය කරන නවසීලන්තය තුල පවා මේවා අලෙවිය තහනම් කොට තිබියදී අපේ රටේ සෞඛ්‍ය අමාත්‍යංශයට තවත් පර්යේෂණකිරීමට අවශ්‍ය වීමයි.
මීට කලකට ඉහතදීද රජරට වකුගඩු රෝගය පදනම් කරගෙන මෙවැනිම සිදුවීමක් ඇතිවිය.එහිදී ආනයනික කෘෂි රසායනිකවල ආසනික්‌ හා කැඩ්මියම් වැනි බැර ලෝහ අඩංගු බවට චෝදනාවක් එල්ල විය.මෙලෙසටම එහිදී ආනයනය කල රසායනික තොගයක් වරායේ රඳවාගත් අතර රට තුල අලෙවියද තහනම් කළේය.මේ චෝදනාව පසුව පර්යේෂණවලින් තහවුරු විය.ඉන් පසු කෘෂිකර්ම අමාත්‍යංශයෙන් මේ පිළිබඳව විවිධ කතාබහ ඇතිවූ අතර පසුව සියලු කතාවන් යටපත් වී කෘෂිරසායන තොගය නිදහස් කොට නැවත අලෙවියටද අවසර ලැබිණි.
මෙම කිරි පිටි සිද්දියටද ඉදිරියේදී මෙවන් දෙයක් සිදු වුවහොත් අප පුදුම විය යුතු නැත.මන්ද එය මේ රටේ වැඩ කටයුතු සිදුවන ආකාරය නිසාය.අනෙක් අතට ලෝකයේ පිරිසිදුම ඇපටයිට් වර්ගයක් වන එප්පාවල ඇපටයිට් අපනයනය කොට ඊට නොයෙකුත් බැර ලෝහ කලවම් කොට ආනයනය කර භාවිතයට ගන්නා  ජාතියකට පිට රටින් ගෙන්වන ඕනෑම ජරාවක් කිසිඳු  ගැටලුවකින් තොරව අලෙවි කල හැකි වීම නිසා ව්‍යපරිකයන්ටද හොදින් හරි හම්බ කල හැක.මට හිතෙන හැටියටනම් ආශ්චර්යය දැනටම පහල වී ඇත.මෙය ආසියාවේ ආශ්චර්යය නොව මුළු විශ්වයටම ආශ්චර්යයකි.


Sunday, July 8, 2012

මඩ ගැසීම තහනම්



අපේ මාධ්‍ය ඇමතිතුමා පහුගිය දවසක මාධ්‍ය හමුවකදී කියා සිටියේ සියලු මඩ වෙබ් අඩවි තහනම් කරන බවයි.ඒ අනුව පසුගිය සති අන්තයේ වෙබ් අඩවි කාර්යාල දෙකක් වටලා සේවකයන් හා පරිගණක ආදියද අත් අඩංගුවට ගෙන තිබිණි.එලෙස බලපෑම් කල SRI LANKA MIRROR අඩවිය මාද ඉදහිට නරබන වෙබ් අඩවියකි.එය බොහෝවිට ප්‍රධාන ලෙස කාලින පුවත් අඩවියක් වුවත් ගොසිප් නැතුවාම නොවේ.

මා එම අඩවිය නැරබීමට පටන් ගත් ආකාරයේද විශේෂත්වයක් ඇත.ඒ මිට කලින් වෙබ් අඩවි ලියාපදිංචිය පිළිබඳව කතාබහ පැවති දින වල එම පුවත් හරහා ගොස්ය. මා මෙන් තව කි දෙනෙක් මෙවන් සිද්දි නිසා මේ වෙබ් අඩවි කියවන්නට පටන් ගන්නට ඇත්ද. කෙසේ වුවත් මෙවන් සිද්දි වලින් වෙන්නේ මේ වෙබ් අඩවි තව තවත් ජනප්‍රිය වීම පමණකි.මොකද කොච්චර දැගලුවත් මේවා සම්පුර්ණයෙන්ම තහනම් කල නොහැකිය.
කෙසේ වුවත් ගොසිප් ඇතුවත් බැරි නැතුවත් බැරි දෙයකි.බොහෝ විට මෙවන් පුවත් අඩවි වලින් කරන්නේ පොල්  කෙන්දක් තරම් පුවත කන්දක් තරම් විශාල කොට පෙන්වීමය.

නමුත් මෙවන් නීතියක් ක්‍රියාත්මක කරනවානම් සර්ව සාධාරණ විය යුතුය.එනම් ආණ්ඩු විරෝධීන්ට පමණක් නොව ආණ්ඩුවේ බත් බැලයන්ටද  මේ දඬුවම් පැනවිය යුතුය.අනෙක් අතට මෙවන් වෙබ් අඩවි වල පාඨක පිරිස බොහෝ සිමා සහිතය.ඊට වඩා මිනිස්සුන්ට සමීප ගුවන් විදුලිය,රුපවාහිනිය හා පුවත් පතයි.ඒ  නිසා ඇමතිතුමාට  තහනම් කල හැකි වැඩසටහන් කිහිපයක් මටද අත්දැකීමෙන් නිර්දේශ කල හැක.ඒවානම් ඇහින්ද මඩේසුන්දරගේ විමසුම හා හඩ්ඩාගෙ රට(කොහේ තියෙන රටක්ද දැන් නෑ) යන අතයි.කනින් කොනින් ඇසි ඇති ආකාරයට ලේක් හවුසියේ දිනමිනද අසත්‍ය දත්ත ඇසුරින් ජනතාව රවටා ඇත.

මට තේරෙන විදිහටනම් වෙබ් අඩවි වලට වඩා හානියක් මේවා මගින් කල හැක.ඒ නිසා හොඳම දෙය නම් මේවාට එරෙහිවද ක්‍රියාමාර්ග ගැනීමයි.නමුත් එය කවදාකවත් නොවෙන දෙයකි.මොකද ඕව කරන්නට උදවු කරන්නේද දඬුවම් කරන්නේද එකම අය බැවිනි.කෙසේ නමුත් අන්තිමට වන්නේ කාගේ කාගේත් හෙළුව හොඳින් නිරාවරණය වීමයි.

Monday, July 2, 2012

කවුද යකෝ පැන්නේ?

මේක මගේ අතීත කතාවක්.මම එකේ ඉඳල පහට යනකම් ඉස්කෝලේ ගියේ ප්‍රාථමික පාසලකට.ඒක මිශ්‍ර පාසලක්‌.ඒකේ එක ශ්‍රේණියකට පන්ති තුනයි තිබුනේ.ළමයි හිටියෙත් 500 කට අඩු ගණනක්.අපි පහ වසරට යනකොටත් අකුරු බැරි ළමයි පහක් විතර අපේ පන්තිවල හිටියා.හැබැයි ඉතින් හැම අවුරුද්දෙම ශිෂ්‍යත්වෙන් හොඳම ප්‍රතිපල ගත්ත කොට්ටාශයේ පාසල් දෙක තුන අතර අපේ පාසලත් තිබුනා.දැනටත් එහෙමම තමයි.දැන් පඳුර වටේ තැලුව ඇති වගේනේ.


මේක උනේ මම තුන වසරේ ඉදිද්දී.හරියටම කියනවනම් 1998.ඒ දවස් වල අපේ පන්ති භාර ගුරුතුමියට බබා හම්බ වෙන්ට හිටිය නිසා නිවාඩු ගිහින් හිටියේ.ඒ නිසා අපේ පන්තිය දෙකට බෙදල අනිත් පන්ති දෙකට එකතු කරලා තිබුනේ.අපි හිටිය A පන්තියෙන් භාගයක් B පන්තියටත් අනිත් භාගේ C පන්තියටත් බෙදල තිබුනේ.මාව වැටුනේ C පන්තියට.පන්ති වල හිටියේ 30 ක් 35 ක් විතර හින්ද ඒක එච්චර ගැටළුවක් උනෙත් නෑ.


අපේ මුළු ශ්‍රේණියටම ඉංග්‍රීසි කලේ එක මැඩම් කෙනෙක්.සුපුරුදු විදිහට මැඩම් එදත් අපිට පාඩම උගන්නවා.ඔය අතරේ පන්තියේ කොල්ලෙක් (අපි ලේසියට සුගත් කියමු) පස්සහ ඉඳං මොකක් හරි කුප්ප වැඩක් කරලා.සුගත් ගෙ වෙලාවට  මැඩමුත් ඒක දැකල.මෑන්ස් මට පස්සහින් හිටිය නිසා මම ඌ කරපු වැඩේ නම් දැක්කේ නෑ. මැඩම් පස්සේ සුගතව බයිට් එකට ගත්ත. 


දැන්  අපි ඔක්කොම හැරිලා සිද්දිය බලාගෙන ඉන්නේ.කොහොමටවත් සිංහලත් බැරි සුගත්ට ඉංග්‍රීසි දිරවන්නේ නැති ඒක අරුම පුදුම දෙයක් නෙමෙයිනේ.මැඩම් දැන් සුගත්ට බැනගෙන බැනගෙන යනවා.සුගතත් මහ පොළොවත් එක්ක ගේමට වගේ බිම බලන් ඔරවන් ඉන්නවා.


දැන් ඔහොම විනාඩියක් දෙකක් සිද්දිය යනකොට එහා පන්තියේ ඔක්කොමත් මේ දිහා බලන් ඉන්නේ.(ඒ කාලේ පන්ති කාමර වෙන් කරලා නෙමෙයිනේ තිබ්බේ.)ඒක පාරම සුගත් ගත්ත බෑග් එක අතට පැන්න එලියට.ආයේ ඉතින් හුරේ රන.මැඩම්ටත් නිකන් එක පාරට ජින්ගල් වගේ.දැන් සහෝදර සහෝදරියනි මේ වීර කොල්ලන්ට බලන් ඉන්ට පුලුවන්ද?හරි මන් අහන්නේ පුලුවන්ද?ආයේ කතාවක් දෙකකක් නෑ මැඩම් මොනවා හරි කියන්ට හිතන්ටත් කලින් කොල්ලෝ ටික පැන්න එලියට සුගත පස්සේ එලවන්ට.

දැන්  නිකන් හරියට අර හොරා පස්සේ එලවන පොලිසිය වගේ අපි ටික සුගත් පස්සේ එලවනවා.අපේ පන්තිය තිබුනේ වැට අයිනේ නිසා ඌ තාර පාර  දිගේ ගෙවල් පැත්තට දිව්වේ.අපිටත් ඉතින් වගේ වගක් නැතුව පන්නවා.කොහොම හරි ටවුමට ආවට පස්සේ කට්ටියටම ඇති කියල හිතුන නිසා ආපහු එන්ට ආව.කඩේකින් ටොපිත් ඇරගෙන කට්ටියම කකා ආතල් එකේ දැන් එනවා.දැන් තමා හොඳම හරිය.


කට්ටියම ගේට් එකෙන් ඇතුලට එනකොට ප්රින්සිපල් මැඩම් තව ගුරුවරු දෙතුන් දෙනෙක්  එක්ක එතන.කට්ටියම නිකන් වීරයෝ ටික වගේ ඇතුලට ආව."ආ කට්ටිය ආවද.ඔහොන්ම එමුකො පිට්ටනියට."ලොකු මැඩමුත්  එහෙම කියාගෙන ඔපිසියට ගියා.අපිටත් ඔකේ බරක් පතලක් තෙරුන් නැති නිසා අපිත් පිට්ටනියට ගියා.

දැන් තමා කට්ටියට වැඩේ මීටර් උනේ.මෙන්න ලොකු මැඩම් එනවා කෝටුවත් අරන්. දැන් මැඩම් බැනගෙන බැනගෙන යනවා.අපි ඉතින් ඇටි කෙහෙල් කාපු උගුඩුවො වගේ බිම බලාන ඉන්නවා.වටේට බලන් ඉන්න උන් හිනා වෙනකොට නිකන් උන්  මරන්  කන්න හිත.කොහොමින් කොහොමින් හරි අන්තිමට අපි හත් දෙනෙකුට කෝටු පාරවල් තුන ගානෙත් ගේට්ටුව ගාවට විතරක් ගිය එකෙකුට එක කෝටු පාරකුත් වැදුන.මගේ වෙලාව කොච්චර හොඳද කියනවනම් අපේ අම්ම ගුරුවරියක් උන නිසාත් ලොකු මැඩම් හොඳට අඳුනපු නිසාත් මට පාරවල් හතරක්ම ලැබුනා.අම්මා සනීපේ.හොඳම වැඩේ කියන්නේ ඒක නෙමෙයි.සුගත පස්සේ පන්නපු අපි ඔක්කොම එක ගුටියක්‌ හරි කෑවා. හැබැයි සුගත්ගේ ගෙදරින් ගෙන්වල ඌට අවවාද කරලා අත්හැරිය.
ඕකට තමයි කියන්නේ අතේ සල්ලි දීල පු* ටින් කිරි ගා ගන්නවා කියල.!!!!!



Tuesday, June 19, 2012

අපේ ක්‍රීඩා විකාශනය

ඔලිම්පික් ක්‍රීඩා උළෙල ළඟ එමින් පවතී.ලෝකයේ ක්‍රීඩා ලෝලීන්  බලා සිටින්නේ අවුරුදු හතරකට වරක් එළබෙන මේ මහා ක්‍රීඩා උළෙල නැරබිමටය.එමෙන්ම බොහෝ ක්‍රීඩක ක්‍රීඩිකාවන් බලා සිටින්නේ ඔලිම්පික් පදක්කමක්  දිනාගැනීමට නොහැකි නම් අවමතරමින් තරගයකට හෝ සහභාගි වීමටය.දැන් වැඩ කටයුතු සිදු වෙන ආකාරයට නම් අපේ ක්‍රීඩක ක්‍රීඩිකාවන්ට පදක්කම් තබා සහභාගිත්වයද එක්තරා අන්දමක සිහිනයක්ම පමණි.ඒ අපේ ක්‍රීඩාවේ දියුණුවන ලක්ෂණය.


මේ දිනවල අපේ රටේ ඔලිම්පික් විකාශන අයිතිය පිළිබඳව නඩුවක් විභාග වේ.පළමුව විකාශනය පිළිබඳව පූර්ව ප්‍රචාරක පට විකාශය කලේ ජාතික රූපවාහිනියයි.නමුත් පසුව mtv ආයතනයද ලන්සු තබා මෙහි විකාශන අයිතිය ලබා ගත්තේය.මෙය ආරංචි වූ වහාම සැළලිහිනියාට චූන් විය.mtv ආයතනයට එරෙහිව නඩු පවරා ඔලිම්පික් විකාශනයට එරෙහිව වාරණ නියෝගයක් ලබාගත්තේය.එය ඔවුන්ගේ පැත්තෙන් සාදාරනය.මොකද එකම දේ දෙගොල්ලොම පෙන්වීමට ගියාම ad අඩුය.එවිට ආදායම අඩුය.


මෑතකදී ඉදිරි වසර 3 සඳහා ක්‍රිකට් තරඟ විකාශනය සඳහා ලන්සුපත් කැදවා තිබිණ.නමුත් ඔලිම්පික් වලට කෙලගන්නා මේ දෙගොල්ලොම මේ අවස්ථාව අමතක වී ඇත.එහෙම නැත්තම් ඒ ගනුදෙනුව වැඩි ලාබ ලැබිය හැකි ගනුදෙනුවක් නිසා විය හැක.(නැත්තම් උපාලි ධර්මදාස මහතා ලඟදි සොයා ගත් ආකාරයට ජනපති පුතාලගේ චැනල් එකත් එක්ක  තරග කල නොහැකි නිසාද දන්නේ නැත.)
 නමුත් එක් වරම නින්දෙන් ඇහැරුණු  mtv ආයතනය දැන් ක්‍රිකට් පාලක මණ්ඩලයට ලියුම් ලියමින් දගලන්නට පටන් ගෙන ඇත.සමහරක් විට ඔතන යටි අරමුණක් තිබිය හැක.හැබැයි ඉතින් බෙබිලාට මල පැන්නොත් මහරාජාට බඩුම තමාය.මට නම් ඔය මොකා ඕක පෙන්නුවත් මට පෙනේ නම් කිසිම මෙව්වා එකක් නැත.හැබැයි ඉතින් අර කොල්ලෝ ටික ගිනි අව්වේ කට්ට කකා රටට ගෙනත් දෙන මුදල් වංචාවෙන් සාක්කුවේ දාගන්න එකනම් පට්ට චාටර්ය.ඔව්වාට කවදාක හරි රිටර්න් එක ලැබෙනු ඇත .එදාට ඔය කොයි බේබිටත් ඇපත් නැති  බවනම් තක්කෙටම සුවර්ය.



Pictures from::
http://aluthwadapage.blogspot.com/2012/05/blog-post_5589.html

Friday, June 8, 2012

බස් වල යන ඈයන්ගේ අවධානය පිණිසයි



පසු ගිය සති අන්ත ජාතික පුවත් පතක අපූරු පොකට් කල්ලියක් පිලිබදව පුවතක් තිබිණි.ඒ පුවත බස් වල එදිනෙදා ගමන් කරන කාගේත් අවධානය යොමු විය යුත්තකි.ඒ පුවතට අනුව කොටුවී තිබුනේ කාන්තා පොකට් කල්ලියකි.ඔවුන් 22 හා 25 වයස් වල පසු වන තරුණියන් දෙදෙනෙක් හා 58 හැවිරිදි කාන්තාවකි.


අත් අඩංගුවට ගත් තරුණියෝ දෙදෙනා මැදිවියේ කාන්තාවගේ ඥාති දියණියන් දෙදෙනෙකි.තිදෙනාම මාතලේ පදිංචි ද්‍රවිඩ ජාතිකයන්ය.මැදිවියේ කාන්තාව මේ ජොබ් එක වසර දහයක සිට කරගෙන යන බවද ඔවුන්ගේ මාසික ආදායම රුපියල් 50000 ක් පමණ බවද හෙළිවී ඇත.


ඔවුන් පොකට් ගසන්නේද අලුත් ක්‍රමයකටය.ප්‍රශ්න කිරීම් වලදී හෙළිවූ ආකාරයට ඔවුන් වැඩිපුර තට්ටු කර ඇත්තේ කොල්ලන්ගේ පොකට්ටු වලටය.තරුණියන් දෙදෙනා බසය තුල ගමන් කරන තරුණයන්ගේ ඇඟට තදවී තුරුළු වී යද්දී අනික් අම්මණ්ඩි  තරුණයාගේ පර්ස් එකට ගේම දෙයි.තරුණියගේ ආතල් එකෙන් මනෝ පර ගසාගෙන යන කොල්ලාට වැඩේ මීටර් වන විට සියල්ල සිදුවී හමාරය.කොහොමත්කොල්ලෝ නිකන් දෙන අස්සයන්ගේ දත් ගනින්නේ නැති නිසා ඔය වගේ ආතල් දෙනකොට විරුද්ද වන උන් ඇත්තේම නැති තරම්ය.


පිරිමින්ගේ පමණක් නොව ගෑනුන්ගේ මලුද ඔවුන් සුද්ද කර ඇති බව වාර්තා වේ.ඒ නිසා මේ පුවත ගනු පිරිමි කොයි කාටත් වැදගත් වේ.කොල්ලනි බසයේ යන විට බලෙන් ආතල් දෙන ගෑනුන්ගේ ආතල් ගැනුමට පෙර 
වරුවක් හිතන්න 


මේකත් බලන්න.
මෙන්න තවත් බඩු දෙකක්.

Saturday, June 2, 2012

මොකක්ද මේ මෙව්වා එක.

                    මාස අටක විතර ඉදල බ්ලොග් කියවන මමත් මගේම කියල බ්ලොගක් පටන් ගත්තා.ඒක ඉතින් ලංකාවේ එවුන්ගේ හැටිමනේ.කවුරුහරි මොනවා හරි කරනවා දැක්කොත් පුලුවන්ද බැරිද නොබලා ඒකම කරන්ඩ යනවා.උදාහරණයක් කිව්වොත් Chinese කඩේක වැඩකරන කොල්ලෙක් කොහොම හරි සල්ලි ටිකක් එකතු කරගෙන බලන්නේ උගේම කියල Chinese එකක් දාගන්න. බස් එකක වැඩ කරන එකත් කාලයක් වැඩකරනකොට බලන්නේ උගෙම කියල පරණ හරි බස් එකක් අරන් පාරට දාන්න.හරි බොරුද?මමත් මේ try කරන්නේ ඒ වගේ වැඩකටම තමයි.හැබැයි පොඩි(කිව්වට ලොකු)අවුලකට තියෙන්නේ මම කවදාවත් හොඳ රචකයෙක් නොවෙන එක තමයි ඉතින්.
                     ඉතින් එහෙනම් ඉස්සරහට අපි බලමු සුන්දර,අසුන්දර මතක හා මත.හැබැයි තවත්  අවුලක් තියෙනවා.ඒක තමයි අර නිකන් starter එක බුරුල් වෙච්ච බට light එකක් වගේ මට ඔව්ව මතක් වෙන්නේ එක එක වෙලාවකට.ඒ හින්ද මේකේ පිළිවෙල ගැන මුලින්ම පටන් ගන්නකොටම සමාව භජනය කරනව.එහෙනම් අලුත්ම මොකක් හරි මෙව්වා එකක් එක්ක ලගදීම හමුවෙමු.එතකන්
                                           ජය වේවා.
(ජය වේවා කිව්වම ඔතන කිසිම්ම දේශපාලන මෙව්වා එකක් නැති බව කරුණාවෙන් සලකන්න.)
   ‍‌‌‌‌‌‌

Thursday, May 31, 2012

ආයුබෝවන්

ආයුබෝවන්.ඔන්න එහෙනම් පටන් ගත්තා බ්ලොග් අවකාශේ මෙව්වා එක.